خيام التهجير.. تفاصيل توجع الكرامة!
رابط مختصر
Google Plus Share
Facebook Share
 
بالانتقال بين تركيا وسوريا كأنك تنتقل من عالم لآخر..
 
أيضاً هنا في سوريا بريف حلب تبدو المدن والقرى في عالم والمخيمات بعالم آخر ..
 
عشر دقائق اليوم بالسيارة تحت المطر في طريقنا إلى المخيم كانت بمثابة عبور سنين قهر ...
 
الطين شبر بعد المطر
شو يعني "مخيم وخيم"!؟
 
مخيم يعني حمامات مشتركة يعني إذا بدك تروح عالمراحيض بدك تطلع من بيتك اللي هو الخيمة وتمشي بمكان سماكة الطين فيه 10 سم تحت المطر وكل العوامل الجوية من برد ورياح وو... ستكون موجودة في ذلك الطريق! ...طبعا هون تخيّل إذا المرأة حامل أو الطفل مريض أو شخص مكرّب مثلا...أديش كمية السعادة والرفاه اللي عايشينها!
 
مخيم يعني حمامات مشتركة، يعني حتى يتحمم فرد من العائلة بدو يصف عالدور سواء كانت إمرأة أو رجل أو طفل
وفيك تتخيل بقية القصة من كونك مضطر أو مضطرة للحمام وأنو رح تطلع من الحمام عالفلا، والأرض تراب أو طين وناس حواليك...لبيس البرنص الأبيض أو منشفتك الصفرا وتخيل!!..
 
خيمة يعني ما فيها مطبخ! يعني إذا بدك تغسل إبريق الشاي أو الصحن فبدك تروح عالحمامات أو تغسل ببرميل أو سطل بالخيمة ..
 
خيمة يعني ما في مي! كل ما بدك بتفتح الحنفية بتغسل بتشرب بتغسل الخضرة ..الأواني ...إلخ
 
خيمة يعني ما في دراسة! ..ما في شغل! ..ما في ..ما في ..
 
خيمة يعني ما في خصوصية! ..يعني مو أنت بتربي ولادك وإنما المخيم يعني ..يعني ...يعني ...
 
خيمة يعني عيشة مستحيل تنوصف بالكلام! ..خيمة يعني مجموعة تفاصيل بتوجع الكرامة ..
 
بقلم: عمران نصر الدين
أطـفــال الغـوطــة الشـرقيــة الـمُـهـجّـرون إلى الشمـال الســوري
نتشرف بمتابعتكم لصفحتنا على الفيسبوك
روزنامة الأخبار
جميع الحقوق محفوظة للمكتب الإغاثي الموحد